الأربعاء، 25 فبراير 2009

مـــذكــرات مـــريــض نـــفـــســي _ (3) الجزء التاني _ أيمن نـور

من الحلقه الاولي في الغربه وقد ايه وجعتني وفكرتني بكل حاجه انا عايشها ومش بنساها عشان افتكرها بس كل ما افتكرها بفتكر كل حاجه وحشه جوايا اتغيرت وكل طبع انا اكتسبته وكارهه في نفسي وكل حاجه خسرتها في غربتي

احنا لما بنسافر بنبعد عن ناس كتير وزي ماقولنا اهلنا وحبيايبنا واخواتنا واصحابنا
السؤال بقى هو احنا لما بنسافر بتفضل علاقتنا بيهم وحبهم لينا وحبنا ليهم زي الاول؟ والا البعيد عن العين بعيد عن القلب؟

قد ايه الغربه ممكن تقوي قلبك وقلبهم؟ وتقسيك وتعودك على البعاد والفراق وتقسيهم؟

قد ايه بتفقدهم وبتبقى علاقتك بيهم بارده اوي وجافه اوي كأنها قلبت هيه كمان رسميات

يعني حتى اقرب الناس ليك واللي كنت بتحبهم علاقتك بيهم بقت بارده

ماهو اكيد بتنشغل عنهم وحتى الاتصالات مبتعرفش تكلمهم دايما زي الاول ماتعودت تشوفهم وتزورهم ولو قصرت في تليفون لحد فيهم اكيد اكيد اكيد عمره ماهيعزرك وهيشيل منك ولايعرف انت فيك ايه ولا بتعمل ايه ولاعايش ازاي ولا قد ايه مطحون في شغلك وحياتك

وانك لو مرضت وتعبت ونمت في السرير ولو موت حتى محدش هيحس بيك الا بعد ايه؟

لو اتخنقت وتعبت وهتموت من جواك من الالم ونفسك تحكي لحد قريب منك مش هتلاقي حد تحكيله وتأمنله ويحس بيك


هو انت عمرك فكرت انت ليك في بلدك كام صاحب؟ نقول 10 اتفقنا
وليك كام اخ واخت نقول مثلا 3
وليك كام خال وخاله وكام عم وعمه وكام ابن عم وبنت عم وكام بنت خال وابن خال وخاله
وجواز خلاتك وجواز عماتك ومراتات خوالك ومراتات عمامك

تخيل انت نازل مصر قد ايه حجم الهدايا اللي لازم توديها للناس دي وكل واحد فيهم طمعان ومعشم انك تجيبله هديه كبيره لو جبت هديه صغيره تتكره وتبقى بخيل وتبقى هما اكيد مش غاليين عليك ومش مقدرهم وبتهينهم بهديه صغيره زي دي
ولو جبت هديه كبيره يستقلوها ويقوللوا دي بس؟

والكل ميعرفش انت كام مرتبك؟ وبتاكل بأيه وبتسكن بأيه وبتعيش ا زاي وبيفضل معاك ايه؟ وبتدفع ايه هدايا ولكام واحد بتجيب؟

بتدفع مصاريف تليفونات كام؟ اللي لو قصرت مع واحد من كل اللي فاتو دول في اتصال تبقى فضيحه وتبقى قليل الزوق وتبقى مبتصلش الرحم وتبقى انت ابن ستين كلب سوري في اللفظ يعني

هيفضلك ايه من مرتبك؟

كام فاضل؟

نعم؟

هو اللي بتقول عليه ده هيعملك ايه؟ طيب انت متغرب ليه؟ وهل اللي طلعلك وبقيلك ده يكفيك تكون نفسك؟ يعوضك عن غربتك؟

بقالك كام سنه مسافر؟

عملت لنفسك ايه؟

هو انت بقى عمرك كام دلوقت؟

يااااااااااااه سنين سنين ضاعت من عمرنا والواحد مش عارف اخد ايه من غربته لامنها عائد مادي يعوض اللي فات مننا وخسرناه ولامنها رجعنا بلدنا ومخسرناش أقل حاجه وهيه حب اهلنا وصحابنا

طيب لو فكرنا نرجع هو ده صح القرار؟

نرجع ازاي؟

بعد السنين اللي فاتت دي كلها ازاي نرجع؟

احساس الفشل واحساس السنين اللي ضاعت واحساس الندم عليها واحساس كره الناس ليك ومفكرينك بتكدب عليهم

هتقدر تمد ايدك لأبوك او لأمك تطلب منهم فلوس بعد مانت كنت بتديهم فلوس؟

عايز تشتغل في بلدك وتدور وتلف واول ماتلاقي شغل هتلاقي شغل بكام؟ وهيعملك قد ايه؟ وهل هو كافي انك تقدر تعيش زي ماكنت عايش في غربتك؟

هتقدر تكون نفسك منه؟ وتتجوز وتعمل لنفسك بيت واسره وتصرف عليهم وتكفيهم؟

هتقدر تشوف زميلك رئيسك في عمل؟ كل الفرق بينه وبينك انه اشتغل قبلك وانت اكفأ منه

انت لو سبت غربتك قد ايه ممكن تخسر؟ قد ايه ممكن تتذل؟ قد ايه هتبقى مكشوف اكلك وشربك وفلوسك معاك قد ايه لكن طول ماكنت في الغربه زي مابيقولوا السيط والا الغنا محدش عارف بتاكل ايه وبتشرب ايه وساكن فين ومعاك ايه وبتتعب ازاي وبتتذل ازاي وبتبقى قدام اهلك وناسك باشا وراسك مرفوعه ومحترم لما تنزل بقى هتبقى راسك في الارض ومزلول

قد ايه خسرانين احنا في غربتنا وقد ايه هنخسر كمان لو رجعنا بلدنا

قد ايه احنا نفسيتنا مدمره

قد ايه احنا بنموت ولاحد بيحس بينا

وبنصرخ من جوانا ولاحد سامع صوتنا

بنبكي وبنبكي بحرقه اوي بينا وبين نفسنا ومجدش بيمسح دموعنا الا ايدينا

هو احنا بعد ده كله ممكن نكون ناس طبيعيين؟

والله احنا لو مبقينا مرضى نفسيين يبقى احنا مبنحسش وجتتنا نحست من كتر مابنشوف

داحنا لازم نبقى مرضى نفسيين
لازم نبقى مرضى نفسيين
لازم والله نبقى مرضى نفسيين

الثلاثاء، 24 فبراير 2009

إحم إحم

إحم إحم نسيناها والبجاحه بقت في دمنا - وفي الغلط ناكل الزلط ومبقاش يهمنا

إحم إحم والزوق في الزمن ده بيتلحم - وبقينا بنرضي بضعفنا

إحم إحم ويقولولي كبر ده غصب عننا - ليه اكبر وازاي اكبر الله اكبر ياناس طيرتوا عقلنا

إحم إحم كل يوم بشوف عجايب - والأدب في الشوارع معدوم وغايب

إحم إحم بنات بتلبس من غير هدوم - بنات تشيش بنات بتشرب في السموم

إحم إحم بنات تعاكس في الشباب - بنات حياءهم بقى سراب

إحم إحم بنات تخطط بنات تظبط - بنات تشبط بنات تربط

إحم إحم شوفت منهم انا شوفت ياما - بنات بتخلع بالسـلامه

إحم إحم لا راجل نافع ولا ضل حيطه - الزمن ده فات صدر العبيطه

إحم إحم الست أمينه بقت أليطه - بقت بتحكم وبقت بتأمر بقت تزيط في اي زيطه


* * * * * * * *

حم إحم نسيناها والبجاحه بقت في دمنا - وفي الغلط ناكل الزلط ومبقاش يهمنا

إحم إحم والزوق في الزمن ده بيتلحم - وبقينا بنرضي بضعفنا

إحم إحم ويقولولي كبر ده غصب عننا - ليه اكبر وازاي اكبر الله اكبر ياناس طيرتوا عقلنا

إحم إحم شباب تتوه في جنسه وتوه في لونه - شباب مسقط بنطلونه

إحم إحم شباب يقولك خد فطيرك - ياخي ايه سفن ايه فيك وفي غيرك

إحم إحم شباب بايت على القهاوي - شباب بيشرب مخدرات وبلاوي

إحم إحم شباب عاطل شباب يصقف بالباطل - شباب يقولك خليك معاهم تبقى مناضل

إحم إحم شباب هدفها عيش ندل تموت مستور - شباب بيركب في الحنتور

إحم إحم شباب عايش علشان يموت - شباب بيكتم في اي صوت


* * * * * * * * *

إحم إحم نسيناها والبجاحه بقت في دمنا - وفي الغلط ناكل الزلط ومبقاش يهمنا

إحم إحم والزوق في الزمن ده بيتلحم - وبقينا بنرضي بضعفنا

إحم إحم ويقولولي كبر ده غصب عننا - ليه اكبر وازاي اكبر الله اكبر ياناس طيرتوا عقلنا

إحم إحم كانت بتتقال من الناس اللي قبلنا _ إحم احم كلمة معناها تسمحلي ياعمنا؟؟



بقلمي

ايمن نور

الأحد، 22 فبراير 2009

مـــذكــرات مـــريــض نـــفـــســي _ (3) أيمن نـور


الــغــــربــــه


قد ايه الغربه دي صعبه ... قد ايه بتعلم القسوه وبتموت القلب .. قد ايه الغربه دي ممكن تقتل حاجات كتير حلوه جوه الواحد فينا


قد ايه بعدك عن أهلك واصحابك واخواتك وحبيايبك وحلم عمرك وعاداتك وتقاليدك وانخراطك في مجتمع فيه عادات تانيه غريبه عنك وناس تانيه كل علاقتك بيهم مصالح وبس قد ايه ده كله ممكن يأثر فيك؟

قد ايه ممكن يأثر فيك ضحكه في وشك مليانه كدب ونفاق - علاقات ومعارف وناس كتير وكله بيحبك عشان مصلحه عايزها منك خدمه وبعد خدمته لو شافك بعديها ممكن ميرميش عليك السلام حتى

قد ايه كان فيك حاجات جميله كتير اوي طيبه وحنيه وقلب ابيض على طبيعتك مع الناس
حسن النيه اوي
وفجأه تفقد طيبتك وحنيتك وتبقى شخص قاسي اوي بحكم قدرتك على انك تصبر على بعد اهلك وحبايبك عنك
تبقى قاسي انك شغلك وطبيعة عملك تفرض عليك الجديه
تبقى شخص متكلف في تصرفاتك محسوب عليك الخطوه والحركه والكلمه محسوب عليك الغلط ومحسوبلك الصح

لازم تفكر الف مره قبل كل خطوه بتعملها ولو غلطت لازم بسرعه اوي تصلح غلطك والا هتتحمله وهتخسر كتير اكتر ماخسرت قبل كده

تخيل قد ايه نفسيتك تعبانه قد ايه لو تعبت ومرضت بصيت حواليك تلاقي نفسك في شقه لوحدك في اوضه محدش يقولك فيها مالك محدش يناولك كوباية مايه تشرب محدش يسأل عنك لو غبت الا اصحاب الشغل والمصالح وميهمش انت ميت والا تعبان لكن يهمهم مصلحتهم ليه مخلصتش لحد دلوقت

تبص في رمضان شهر الخير والفرح والصيام

شهر بناكل فيه احسن الاكلات والحلويات شهر نفسك تروح بيتك تلاقي وقت الفطار نحد عاملك الفطار تقعد وتاكلوا سوا وتستريح بعد الاكل

مش تروح البيت تفكر هتسلكها بأكل ايه عشان تلحق ترجع شغلك تاني


وفي العيد نفسك تشوف حد يقولك كل سنه وانت طيب ويحضنك ويبوسك
تقضي اجازة العيد وشك في الحيط يمكن تبكي يمكن تحزن يمكن تفتكر زكري حلوه كانتلك في العيد يمكن تفتكر اهلك يمكن يمكن يمكن

لكن انك تكون سعيد في العيد ده اللي مش ممكن ابدا

تفتكروا بعد اللي الواحد بيشوفوا في الغربه ده كله وبيمر بيه ممكن يكون ايه غير انه مريض نفسي؟