(ما تقولش ايه ادتنا مصر وقول هاندي إيه لمصر)
وكما تم تحويرها الي
(ما تقولش ايه ادتنا مصر علشان مش هاتلاقي حاجة) ..
صحيح هو مصر ادتنا ايه بقى؟؟
نبتدي بسم الله الرحمن الرحيم عشان افوت الأجابه على الناس اللي هترد
الميـلاد
=====
انا بتولد بشوف بتدفع قد ايه عشان تطلع شهادة ميلاد وحلاوة وبقشيش ورشاوي عشان حتة شهادة ميلاد وتكتبها بتاريخ الميلاد اللي على مزاجك ومش بعيد تزور فيها زي مانت عايز لو عايز تعمل شهادة ميلاد لتوت عنخ امون هتعملها مفيش اي مشكله في البلد طلاما بتدفع فلوس
الا ماشوفت مصر واقفه معايا في الطابور وماسكه الاوراق او مره قالتلي والله لتخلي عنك يا ايمن وخلي الحساب عليا المره دي ومدت ايديها في جيبها وحاسبت مكاني او دفعت رشوه او برقت للموظف عشان مياخدش مني فلوس او اثبتت الواد من غير مادفع الفلوس دي كلها؟؟
* التعلـيم
======
بتعلم بفلوسي ولو اتأخرت في دفع المصاريف يطردوني من المدرسه
المدرسين في المدرسه معندهمش ضمير ولافيه رقابه عليهم ولازم تدفع دروس خصوصيه لو ناوي تنجح وتفلح
ولازم تشتري كتب خارجيه عشان تعرف تزاكر منها لعدم كفايه الكتب المدرسيه والاهتمام بيها
الا ماشوفت مصر في مره شالت عني المصاريف او فكرت تشرحلي مصر في مره المواد اللي المدرس كسل او معندهوش ضمير يشرحها او فكرت تغششني في الامتحان ولاتديني درجات رأفه في الكنترول ولا فكرت مصر في مره تعملي منحة وتشيل عني تمن الكتب والملخصات او مصاريف المدرسه
مصر دي شكلها بخيله والا ايه متفهمش
=====================================
السكن؟؟
======
بدفع ايجار في الشهر قد كده بياخدهم صاحب البيت حقه محدش يقدر يقول حاجه
الا مافكرت مصر تديني حته ارض اسكن فيها وتديني شوية حديد وشوية اسمنت وشوية طوب مش هبطح مصر لا ولا هروح في فلسطين ارميهم على اليهود ولا هاخد الطوب ارميه من المدرجات وانا بتفرج على ماتش الاهلي والزمالك لالالا خالص والله
دانا هاخده ابني بيه البيت والعمال اللي هيبنوا عليا انا ياستي بس حاولي تساعديني يامصر
طيب ياشيخه ادفعي عني رخصة المباني اللي بتكلفني في حدود 5 الاف جنيه
طيب يا مصر بصي انا هعمل كل ده لوحدي بس انتي شيلي عني الكهرباء والمايه او المجاري اللي بتطفح دي
احنا يا مصر تعبنا اوي من كتر مابقعد نحوط المجاري في الشوارع بالطوب
يامصر خلي عندك دم وحركي حد من المسؤلين يظبط المجاري دي مش معقول نقعد نطط على الحجاره في الشوارع زي البهلونات كده عشان حضرتك مش مكلفه خاطرك يامصر وعايزه تظبطيلنا الشوارع والمجاري ياشيخه اعملي حاجه بقى مش كل حاجه علينا يعني بجد تعبنا
يامصر دانتي كل ماتبعتيلنا حد من المسؤلين يعملوا الشوارع والمجاري يعملوها اي كلام كده ويسفلتوها بعد مايعذبونا سنين في الطفح ده وبحر القرف اللي بيكون في الشوارع وبعدين تنفجر المايه من نفس المكان عشان يكسروا الاسفلت ويصلحوها تاني ويسفلتوا اكتر من عشر مرات لنفس المكان
قوليلي يا مصر هو مين صاحب شركة المجاري وشركة الاسفلت؟
مين صاحب المصلحه يامصر؟
طيب يامصر شكلك اتخرستي
الأكل والشرب؟
==========
يامصر مافكرتي مره تعزميني على سندوتش ولاتجبيلي اكل مره من المعونات اللي بتبعتيهم لدول مش محتاجه معونات دي يا مصر
يامصر انتي مليانه مزارع ومليانه اراضي بتنتج كل حاجه الا ما مره شوفتك مره داخله عليا بكيس فاكهه والا بطيخه يامصر
يامصر حتى مره تبعتيلي قفص طماطم من اللي مليان هرمونات مالوش طعم الطماطم ده والا تبعتيلي حاجه من اللي بتتزرع في مصر وتجبلنا الامراض يامصر ابعتيلي شوال قمح من اللي بتستورديه يا مصر يامصر حرام انا بقف في طابور العيش بالتلات ايام عشان اجيب فطار ببقى عايز افطر يوم السبت الصبح اروح الفرن الاقي نفسي بحضر فطار يوم التلات مينفعش كده يا مصر بقى
انتي عندك اكل كتير وخير كتير بس بيروح فين مش عارف يامصر؟!؟!
اللبس؟
=====
الا مامره فكرتي يا مصر تجيبيلي بنطلون جينز والا قميص والا تشرت يامصر دانتي عندك مصانع لبس كتير اي حاجه ابعتيها ولو ماركة صنع في مصر مش مهم على الاقل اهو احسن من الصيني وانضف منه برضه ههههههه
يامصر القطن عشان الملابس الداخليه القطن بقى شكله عره اوي يامصر انتي اهملتي القطن اوي يامصر داحنا كنا احسن قطن في العالم يامصر
هو ايه اللي حصل للقطن يامصر؟ ومين السبب في كده يامصر؟
اخرس؟ حاضر يامصر انتي الكبيره برضه واحترامك واجب
الشغل؟
=====
الا مفكرتي مره يامصر بعد ماتعلم على حسابي واسكن على حسابي واكل واشرب والبس على حسابي انك تعملي معايا مره دور واجب وتشوفيلي شغلانه في اي مصلحة من حكوماتك يا مصر
يامصر شوفيلي واسطه من البشوات الكتير اللي عندك دول والللي بيقعدوا على المكاتب وياخدور رواتب ومبيعملوش حاجه شوفيهولي يكلف نفسه يمضيلي على ورقه ويشغلني يامصر
يامصر دانتي معارفك كتير في الحزب الوطني وفي الحكومه
يامصر دانتي اللي مشغلاهم متبقيش شخصيتك ضعيفه اوي كده قدامهم
يامصر اخدميني دانا بحبك والله شكلي هكرهك يامصر عشان انتي مبتعمليش حاجه يامصر
الجواز؟
====
يامصر انا عايز اتجوز متيجي معايا نزور اهل العروسه ونسألهم كده وخليكي اعملي معايا حركة جدعنه وشيلي انتي الدبل والا الشبكه عني خدمه يامصر دانتي مليانه دهب والا بصي شيلي انتي الفرح يامصر خلي الفرح في نادي من نواديكي والا في قاعه من قاعاتك الحربيه والا حتى في ساحه شعبيه يامصر وعليا انا المغنيين
انا هجيب شعبان عبد الرحيم بس اخدميني في اي حاجه يامصر
صحيح يا مصر هو انا لما اتجوز هسكن فين؟ هرجع للموال القديم؟ زي ابويا وامي ؟
طيب انا مهاجر وسايبك يامصر لا عايز اشوفك ولاهرجعلك تاني يا مصر لا عايز منك اكل ولا شرب ولا بيت لا عايز سكن ولاتعليم ولا مساعده انا عشانك يا مصر هبيع اهلي وناسي ومش عايز اشوفهم عشان انتي كرهتيني حتي في نفسي يامصر
مصر انتي ساكته ليه؟
متردي يامصر؟
مصر؟
مصر؟
انتي موتي يامصر؟
بقلمي
ايمن نور
