كان يا مكان

كان يا مكان _ كان فيه زمان انسان
ارضه مش ارضنا وفكرو مش زينا بس الشكل يشبهلنا لكنه صايبو جنان
تعبنا فيه اسأله نقوله ايه المسأله يصرخ يقول تعباااااان
نقوله ايه بيوجعك ومن الدوا ايه يمنعك ؟
روح لطبيب يسمعك ويديك شرب والا دهان
يقول انا التعب ده مفيش اطبا تحوشو
ولو قائد جيوش الجان حشدلو حتى جيشو
انا التعب صابني لما شوفت عنيها
وقدام جمالها ضعفت انحنيت وبوست ايديها
سرحت في عنيها وايديها لمساني
سكت الكلام مني ابتسمتلي بسمه أمل كأن فهماني
حبيت اوصف جمالها بشعر بس حروفي كتماني
اقول فيكي ايه ياللي انتي صيباني
راح مني العقل وباقي لجناني
فداكي عقلي وقلبي وعيني ووجداني
نفسي يا زهره تكوني ورده في بستاني
وتحسي بدق قلبي وحضني وحناني
واشوفك كل يوم وتكوني كل يوم وحشاني
خلاص تعبت سكوت ومات خلاص كتماني
صرخت بعلو الصوت انا بحبك موووووووت بس الصراخ صحااااني
انا كنت بحلم؟
كرهت انا الصحيان لاني مش شايفك
عايز اكون سرحان في بوسه في شفايفك
عايش كما الغفلان صاحي وحزين ولهان اغني كما الخَرفَان
ويقولو ده صابو جنان ويحكوا عني كمان قصه في كل زمان
كان يا مكان كان فيه زمان انسان ارضه مش ارضنا وحبه مش زينا بس الشكل يشبهلنا لكنه صايبو جنان
تعبنا فيه اسأله ونقوله ايه المسأله يصرخ يقول تعباااااااان
تعبت من الحرمان نفسي تاني انام وحشني سحر عنيها
باينو ده ادمان لجنه بحلم بيها
وجنة الغلبان دنيا واحلى مافيها انه عاش عميان فتح وشافك فيها
سبح بميت سبحان جمالك ما في الاكوان يحلف كتير حلفان
ان مافيه فنان يقدر يرسم أقل مافيها
وتكوني انتي ملاكي ملاك كما النسمه يكون ده اسعد حظ وتكون دي اجمل قسمه
جنه وفيها ملاك زيك اكيد عمران
حب ودفا وحنان يطمن البردان
يعيش في عيشه امان ويشكر المنان
ان له بيت متصان ميدخلوش الجان
ويطمع ساعتها كمان انه يبقى حقيقه
وانه يلمس ايدها ويشوفها حتى دقيقه
اصحى يا غلبان جالك الفوقان قوم كفايه خلاص
لميت عليك الناس يقولو فيك حواديت
كان يا مكان كان فيه زمان انسان ارضه مش ارضنا وحبه مش زينا بس الشكل يشبهلنا لكنه صايبو جنان
تعبنا فيه اسأله ونقوله ايه المسأله يصرخ يقول تعباااااااان